பாஜ தொடர்ச்சியாக ஆட்சி செய்யும் மாநிலங்களில் ஒன்று மத்திய பிரதேசம். 2003 முதல் 2018 வரை ஆட்சியில் இருந்தது பாஜ தான். முதல்வராக சிவராஜ் சிங் சவுகான் இருந்தார். பாஜ ஆட்சி மீது மக்களுக்கு அதிருப்தி ஏற்பட்டதால் 2018ம் ஆண்டு நல்ல பாடம் தந்தனர். 15 ஆண்டுகளுக்கு பிறகு காங்கிரசுக்கு மெகா வெற்றியை மக்கள் கொடுத்தனர். காங்கிரஸ் ஆட்சியை அமைத்தது. இதை பொறுத்துக் கொள்ள முடியாத பாஜ, குறுக்கு வழியை கையில் எடுத்தது. மக்கள் செல்வாக்கு இல்லையென்றால், பாஜ ஆயுதமே மாற்று கட்சி தலைவர்கள், எம்எல்ஏக்களை இழுத்து போடுவதுதான் வேலை.
இந்த யுத்தி மூலம் காங்கிரஸ் இளம் தலைவரான ஜோதிராதித்ய சிந்தியாவை வளைத்து போட்டது பாஜ. ஜோதிராதித்ய சிந்தியா உயர் வகுப்பை சேர்ந்தவர். இங்கு உயர் வகுப்பை சேர்ந்தவர்கள் வாக்கு அதிகம் உள்ளதால், அவருக்கு முக்கிய பதவி ஆசையை காட்டி இழுத்து போட்டது. அவர் காங்கிரஸ் எம்எல்ஏக்கள் 20 பேரை தன் பங்குக்கு பாஜவுக்கு அழைத்து வந்தார். இதனால், காங்கிரஸ் ஆட்சி கவிழ்ந்து பாஜ ஆட்சி அமைத்தது. ஜோதிராதித்ய சிந்தியாவுக்கு முக்கியத்துவம் கொடுக்கப்பட்டதால், பாஜவுக்குள் ஏற்பட்ட கோஷ்டி பூசல், ஆட்சி மீது மக்களின் வெறுப்பு போன்றவை காரணமாக மத்திய பிரதேசத்தில் பாஜ ஆட்டம் காண தொடங்கிவிட்டது. இதனால், சாதி அரசியலை கையில் எடுத்து உள்ளது பாஜ.
மத்தியப் பிரதேசம் இந்தியாவின் ஐந்தாவது அதிக மக்கள்தொகை கொண்ட மாநிலமாகும். பல மதங்கள் மற்றும் சமூகங்களை கொண்டுள்ளது. 2011 மக்கள் தொகை கணக்கெடுப்பின்படி, 7.26 கோடி மக்கள் தொகையில், சுமார் 6.6 கோடி (90.89%) பேர் இந்து மதத்தைப் பின்பற்றுபவர்களாகவும், 4.77 கோடி (6.57%) பேர் இஸ்லாத்தைப் பின்பற்றுபவர்களாகவும், 5.67 லட்சம் பேர் (0.78%) ஜெயின்களாகவும், 2.16 லட்சம் (0.30%) பேர் பவுத்தர்களாகவும், 2.13 லட்சம் (0.29%) பேர் கிறிஸ்தவர்களாகவும் உள்ளனர். இங்கு உயர் சாதிகளாக பிராமணர்களும், ராஜ்புத்திரர்களும் தான் உள்ளனர். உயர் சாதியாக பிராமணர்கள் இருந்தாலும், மக்கள் தொகையில் 9% பேர் ராஜபுத்திரர்களாக உள்ளனர். இங்கு உயர் சாதி எம்எல்ஏக்களின் பங்கு 37%. பிராமணர்கள் ஆதிக்கம் இழந்ததால் ராஜபுத்திரர்கள் தங்கள் ஆதிக்கத்தை அதிகரித்துள்ளனர்.
மாநிலத்தில் உள்ள 230 தொகுதிகளில் எஸ்சிக்கு 35 தொகுதிகளும், எஸ்டிக்கு 47 தொகுதிகளும் என மொத்தம் 82 தொகுதிகள் ரிசர்வ் தொகுதிகளாக உள்ளது. இங்கு எஸ்சி வகுப்பினர் 15.62 சதவீதமும், எஸ்டி 21.9 சதவீதமும் உள்ளனர். 46 அங்கீகரிக்கப்பட்ட பழங்குடியினர் உள்ளனர். அவற்றில் மூன்று சிறப்பு பழங்குடியினர் குழுக்கள். இந்தியாவின் பல பகுதிகளைப் போலவே, மத்திய பிரதேசத்திலும் சாதி ராஜாவாக உள்ளது. இங்கு பாஜ பாரம்பரியமாக 55 சதவீத மக்கள்தொகை கொண்ட உயர்சாதி மற்றும் ஓபிசிகளின் ஆதரவைப் பெற்றுள்ளது. 37 சதவீதமாக உள்ள எஸ்சி-எஸ்டிகளும், 8 சதவீத மக்கள்தொகை கொண்ட சிறுபான்மையினரும் பாரம்பரியமாக காங்கிரசை ஆதரித்து வருகின்றனர். கமல்நாத், ஜோதிராதித்ய சிந்தியா மற்றும் திக்விஜய சிங் ஆகிய மூவரும் உயர் சாதியைச் சேர்ந்தவர்கள்.
முதல்வர் சிவ்ராஜ் சிங் சவுகான் ராஜ்புத் சமூகத்தை சேர்ந்தவர். 2018ம் ஆண்டு அதிகாரப் பதவிகளை ஓபிசிகள் கைப்பற்றியதால், மாநிலத்தின் உயர்சாதியினர் பாஜ மீது அதிருப்தியில் உள்ளனர். முதல்வர் மற்றும் மாநில தலைவர் இருவரும் இந்த சமூகத்தை சேர்ந்தவர்கள். மேலும், இடஒதுக்கீடு கொள்கை, பதவி உயர்வில் இடஒதுக்கீடு, எஸ்சி-எஸ்டி சட்டத்தில் ஒன்றிய அரசின் திருத்தம், உச்ச நீதிமன்ற உத்தரவை ரத்து செய்தல் போன்றவற்றை யாராலும் ரத்து செய்ய முடியாது என்ற முதல்வரின் நிலைப்பாடு உயர் சாதியினரின் ஒரு பிரிவினருக்குப் பிடிக்கவில்லை. இந்த உயர் சாதியினரின் (22%)கோபத்தை பயன்படுத்திக் கொள்ள காங்கிரஸ் கட்சி இன்னும் ஒரு உத்தியைக் கொண்டு வரவில்லை. ஒருவேளை உயர் சாதியினரைக் கவர்ந்தால் தலித் வாக்கு வங்கி சிதைந்துவிடும் என்று காங்கிரஸ் அஞ்சுவதாக கூறப்படுகிறது.
2018ம் ஆண்டு தேர்தலில் காங்கிரஸ்-பாஜ இடையே வாக்கு சதவீதம் 0.13% தான். இருப்பினும், இடஒதுக்கீடு மற்றும் முன்பதிவு செய்யப்படாத தொகுதிகளில் வாக்குப் பங்கு சற்று மாறுபடுகிறது. ஒதுக்கப்படாத தொகுதிகளில், பாஜ 41 சதவீதத்திற்கும் அதிகமான வாக்குகளையும், காங்கிரஸ் 40 சதவீதத்திற்கும் குறைவான வாக்குகளையும் பெற்றுள்ளது. இந்த தேர்தலில் எஸ்சி-ஒதுக்கீடு தொகுதிகளில் பாஜ மற்றும் காங்கிரஸ் இரண்டும் கிட்டத்தட்ட சமமான வாக்குகளைப் பெற்றிருந்தாலும், காங்கிரசுக்கு 0.3 சதவீத வாக்குகள் அதிகம். எஸ்டி-ஒதுக்கீடு தொகுதிகளில் குறிப்பிடத்தக்க இடைவெளி இருந்தது. பாஜவை விட காங்கிரஸ் நான்கு சதவீத வாக்குகள் முன்னிலை பெற்றுள்ளது.
ஒதுக்கப்படாத தொகுதிகளில் இரு கட்சிகளுக்கும் இடையேயான வாக்கு வித்தியாசம் பாஜவுக்கு சாதகமாக 1.62 சதவீதமாக இருந்தது.
இதேபோல் 2019ல் நடந்த நாடாளுமன்ற தேர்தலிலும் காங்கிரஸ் கட்சியே எஸ்சி, எஸ்டி தொகுதிகளில் ஆதிக்கம் செலுத்தியது. இது வரும் தேர்தல்களிலும் எதிரொலிக்கும் என்பதால் 16% மக்கள்தொகை கொண்ட எஸ்சி பிரிவினரை பல திட்டங்களின் மூலம் ஈர்க்க பாஜ முயற்சித்து வருகிறது. தேர்தலுக்கு முன்னதாக, சிவராஜ் சிங் சவுகான் தலைமையிலான பாஜ அரசு, பந்தல்கண்ட் பகுதியில் ₹100 கோடியில் ரவிதாசுக்கு நினைவிடத்தை அறிவித்து உள்ளது. ரவிதாஸ் தலித் சமூகத்தினரிடையே மரியாதைக்குரிய நபர். போட்டிக்கு காங்கிரஸ் கட்சியின் தேசியத் தலைவர் மல்லிகார்ஜுன கார்கே என்ற தலித்தை களமிறக்கியுள்ளது. இதனால், வரும் தேர்தலில் ஆட்சியை தீர்மானிப்பத்தில் எஸ்சி, எஸ்டி தொகுதிகளுக்கு ஒதுக்கப்பட்டுள்ள 82 தொகுதிகளும், ராஜ்புத் மற்றும் உயர் சாதியினர் வாக்குகளும் முக்கிய பங்கு வகிக்கும். இந்த தொகுதிகளை கைப்பற்ற போவது யார் என்று டிச. 3ம் தேதி தெரிந்த விடும்.
மதம் மக்கள் தொகை சதவீதம்
இந்து 6,60,07,121 90.89%
முஸ்லிம் 47,74,695 6.57%
ஜெயின் 5,67,028 0.78%
பவுத்தர்கள் 2,16,052 0.30%
கிறிஸ்தவர்கள் 2,13,282 0.29%
சீக்கியர்கள் 1,51,415 0.21%
மற்ற மதங்கள் 5,99,594 0.83%
குறிப்பிடப்படாத மதம் 97,625 0.13%
கடந்த 4 தேர்தல்கள் ஓர் பார்வை
ஆண்டு தொகுதிகள் காங்கிரஸ் பாஜ
2003 230 38 (31.61%) 173 (42.50%)
2008 230 71 (32.39%) 143 (37.64%)
2013 230 58 (36.38%) 165 (44.88%)
2018 230 114 (40.89) 109 (41.02%)
The post 5 மாநில தேர்தல்: 360 டிகிரி தினம் ஒரு அலசல்; ம.பி.யில் ஆட்சியை தீர்மானிக்கும் 82 எஸ்சி, எஸ்டி தொகுதி ராஜ்புத் சமூக வாக்குகள் யாருக்கு? ஆட்சி ஆட்டம் கண்டுள்ளதால் சாதி அரசியலை தொடங்கிய பாஜ appeared first on Dinakaran.
